Hossast yfir Lyngdalsheiði

Í gærkvöldi var ég á árlegum sumarfundi BISER-kvenna austur á Laugavatni. Vilborg Auður Ísleifsdóttir sagnfræðingur bauð kvenskapnum í bústað sinn og eldaði smjörsteiktan silung úr Apavatni. Fyrir þá sem ekki vita þá er BISER félag sem sem starfar í Bosníu, Þýskalandi og Íslandi og vinnur að því að styðja stríðshrjáðar konur í Bosníu.

Þótt meira en áratugur sé liðinn frá því að styrjöldinni lauk í Bosníu er ástandið þar hörmulegt. Stríðshörmungar hvorki hverfa né gleymast á einum áratug og margar konur búa yfir  mjög sárri reynslu sem þær þurfa hjálp við að vinna úr. Hér má minna á að Serbar beittu fjöldanauðgunum sem stríðsvopni í þessari viðbjóðslegu styrjöld. Það er mikið atvinnuleysi í Bosníu og margar ekkjur og ógiftar konur (konur eru miklu fleiri en karlmenn) eiga erfitt með að sjá sér og sínum farborða í þessu landi spillingar, glæpa og fátæktar. Það var dæmigert að um það bil tveimur árum eftir að átökunumm lauk létu nánast öll hjálparsamtök sig hverfa og héldu til næsta átakasvæðis. Fólkið sem eftir situr er ekki í því ástandi að geta byggt upp sitt samfélag hjálparlaust, því miður. BISER hefur haldið starfinu áfram og þar hefur Vilborg Auður Ísleifsdóttir gegnt lykilhlutverki en hún tengir saman Ísland og Þýskaland þar sem hún er búsett.

Þetta var fagurt og gott kvöld. Allt á kafi í gróðri því það hefur rignt nokkuð á Suðurlandi undanfarna daga, sem betur fer. Í ljósi mildrar kvöldbirtu stakk kristinast upp á því að við  færum yfir Lyngdalsheiðina á leiðinni heim. Það hefði ég betur látið ógert því vegurinn var algjör hörmung. Ég hef ekki lent í öðru eins um árabil. Algjört þvottabretti og það er aðeins komið slitlag á smá spotta. Við siluðumst áfram á 30 km. hraða og vorum dauðhræddar um bílinn svo mikið hossuðumst við.

Líndalsheiðin er ákaflega fjölfarin leið, um hana fara tugir þúsunda ferðamanna á hverju sumri. Hvernig stendur á því að vegurinn er svona á sig kominn um háannatímann? Af hverju er ekki heflað og haldið áfram að leggja slitlag? Það getur verið ágætt að hafa gamaldags sveitavegi hér og þar, en ekki á þessari fjölförnu leið. Kannski er skýringin sá mikli þurrkur sem verið hefur í sumar en þetta er ekki boðlegt.

 Hér með skora ég á Vegagerðina að láta hefla veginn yfir Líndalsheiði EINS OG SKOT!!! 

Athugasemdir

[Janus, 28.7.2007 kl. 12:55]

Múhahahaha....Líndalsheiði!!!!!!

[Hulda Bergrós Stefánsdóttir, 28.7.2007 kl. 15:33]

LÍNDALSHEIÐI !!!!!!!!

Þar hlýtur dalurinn að vera þakin líni

[Þórður Ingi Bjarnason, 28.7.2007 kl. 16:19]

Það er ekki skrítið að lyngdalsheiðinn hafi verið slæm yfirferðar þar sem ekki liggur vegur yfir þá heiði.  En sá vegur sem oft er kallaður lyngdalsheiði heitir með réttur Gjábakkavegur.  Gjábakkavegur hefur oft verið mjög leiðinlegur yfirferðar og það þekki ég vel þar sem ég ók Hópferðabíl í 12 ár og var þessi leið þá oft farinn.  Það eru komnar hugmyndir af nýjum vegi og hef þær hugmyndir verða að veruleika þá mun hann koma yfir lyngdalsheiði.

[Ómar Ragnarsson, 29.7.2007 kl. 01:03]

Að mínum dómi er röng stefna viðhöfð í vegatengingu Laugarvatns og Þingvalla. Fyrir löngu hefði átt að vera búið að malbika "Konungsveginn" allan, hækka hann lítillega á þeim fáu stöðum þar sem dregur í stóra skafla, og merkja betur og minnka mestu beygjurnar en láta hann halda sér að öðru leyti.

Halda honum síðan opnum að vetri til.

Fyrirhuguð leið fyrir sunnan Konungsveginn er með mun lakara útsýni og hundleiðinleg miðað við hið skemmtilega vegarstæði Konungsvegarins austan við Gjábakka þar sem er fínt útsýni til vesturs yfir Þingvallavatn, framhjá Tintroni, um Laugarvatnsvelli og fram af brúninni fyrir ofan Laugarvatn þar sem Suðurlandsundirlendið blasir við með Heklu í bakgrunni.

Og jafnvel þótt hin nýja og tilbreytingarsnauða leið verði gerð er það til skammar hvernig menn vanrækja hinn stórskemmtilega og merkilega Konungsveg sem er frábær ferðamannaleið.

Ég vil setja í forgang að laga þá leið og þá mun kannski koma í ljós að nýja leiðin verði óþörf.

[Ólafur Þórðarson, 29.7.2007 kl. 15:43]

Vegurinn yfir Lyngdalsheiði er alveg frábær. Leitt ef einhverjum þykir hann hossirí en ég fór hann um daginn og það var skemmtilegasti kaflinn á leiðinni austur svo ég fór hann til baka líka. Og keyrði á um 70 að jafnaði. Það er alveg ´nægur hraði okkar á milli.

Þótti leiðin svo góð að ég einmitt bloggaði smá um hana.

http://veffari.blog.is/blog/veffari/entry/267506/